Hiru neurketa gelditzen zaizkio Ohorezko Mailako taldeari Liga txapelketa amaitzeko. Hiru partidak ere ez dira errazak izango, baina gaur arratsaldekoa bereziki zaila izango da, Lesakako futbol zelaia historikoki zaila izan baita gure taldearentzat. Arratsaldeko 17:30etan hasiko den neurketan etxekoek mailari eusteko egingo dute borroka, eta gureek Hirugarren Mailara igotzeko aukerekin jarraitu nahi dute.
Bihar arratsaldeko 17:00etan hasiko den partidan Elgoibar jasoko du Txerloian Ohorezko Mailako taldeak. Pasa den astean Oñatiko Azkoagainen porrot egin eta gero, hiru puntuak batu nahi ditu taldeak sartuta diren lehian jarraitzeko. Aurrean, ordea, bolada onean den Elgoibar izango dute.
Anaitasunak eta Iraurgi Saski Baloia taldeek iazko arrakasta ikusita, aurten ere Garagardo Azoka elkarrekin antolatu dute. Maiatzaren 5an hasiko da zortzigarren edizioa Goenatxori egindako omenaldiarekin, eta maiatzaren 14ean amaituko da. Aurten ere, iaz bezala, egun eta momentu goxoak pasatzeko moduko egitaraua aurkeztu da Iraurgi Saski Baloia taldearekin bat eginda.
