Asteburuan denetik izan da. Behar gehien duten taldeek ez dute punturik eskuratu. Aldiz, Ohorezko Kadete mutilek eta neskek puntuak batzea lortu zuten. Gehitzen jarraitzen dute, beraz. Zumarragan garaipena Ohorezko Kadete mutilek eta San Juanen berdinketa Ohorezko Kadete neskek Lagun Onaken aurkako derbian. Preferente Mailakoak eta Kadeteen 1. Mailakoak porrot gogorrak jaso zituzten.
Anaitasunak beste erronka bat du bihar Txerloian Oñatiko Aloña Mendi taldearen aurka. Arratsaldeko 16:30etatik aurrera, sailkapenean 12. postuan dauden txantxikuak menperatzen saiatuko dira Aitor Iturberen mutilak. Aurreko astean Txapelketako laugarren garaipena lortu zuen etxean Aloña Mendik Zarautzen aurka, baina, etxetik kanpora oraindik ez dute garaipenik lortu oñatiarrek.
Eguraldiaren aurreikuspena txarra dela eta, Gipuzkoako Foru Aldundiko Kirol Zuzendaritzak partida batzuk bertan behera uztea erabaki du. Erabaki honek Anaitasunako harrobiko hainbat talderengan izango du eragina.
