Anaitasunak laugarren garaipena batu nahi du jarraian eta horretarako bihar Oñatiko taldea, Aloña Mendi menderatu beharko dute. Arratsaldeko 16:30etan hasiko den neurketan aurkari arriskutsu batekin egingo dute topo, Oñatitik urrun 8 puntu batzea lortu baitute orain arte.
Ohorezko kadeteek, neska zein mutilek, San Juanen lortutako garaipenek salbatu zuten pasa den asteburuan Anaitasunaren harrobia. Jubenil eta Infantil nesken atsedenak tarteko, gainerako taldeek porrot egin zuten. Ohorezko Kadete mutilek denboraldiko hirugarren garaipena lortu zuten larunbat eguerdian Beasainen aurka eta Kadete neskek, berriz, bosgarrena lortuta sailkapeneko bosgarren posturaino iristea lortu zuten Zumaiakoren aurka hiru eta huts irabazita.
Martutenera egin beharko dute bidaia bihar gureek, bertan etxeko taldearen aurka indarrak neurtzeko. Arratsaldeko 15:45etan ekingo zaio partidari eta aurrean denboraldiari hasiera kaskarra eman dion taldea aurkituko dute Igor Quindosen mutilek, sailkapenean azken hirugarren postuan baitira martutenearrak. Horrek, hala ere, ezin ditu gureak erlaxaziora eraman, Martuteneko zelaia betidanik izan baita konplikatua gureentzat.
